戀愛真人騷《女神配對計劃2》近日熱播，一眾女神嘅感情動向成為全城焦點。當中參選2024年港姐出身、現為《東張西望》主持嘅 俞可程 ，喺節目中展現出真誠又不失主動嘅甜美形象，更喺「心跳電話亭」環節積極大膽向Oswald方智弘出招捍衛地位，唔止落力俘虜求愛勇者，亦令唔少觀眾同網民大讚佢嘅表現。
外界平時只注意到Kanis嘅外貌同《東張》嘅表現，不過好多朋友都忘記私底下Kanis其實係「真‧學霸」。於城市大學畢業嘅Kanis，入行前已經係一名專業測量師，而令人佩服嘅係，佢參選港姐轉戰娛樂圈後，依然兼任測量師，更有份參與測量師學會年度晚宴，佢仲指自己唔會放棄呢個身份，係圈中另一名專業人才。
近日就有Kanis舊同事於網上發長文，大爆與Kanis昔日合作時嘅極度敬業真面目。呢位舊同事坦言最初以為「港姐捱唔得」，但Kanis嘅熱誠就令佢完全改觀。呢位舊同事回憶話，與Kanis 跟進Project 期間，連續三個月由朝早9點做到凌晨12點，當其時Kanis仲同時要兼顧拍攝同測量工作，忙到不可開交。
最令人震撼嘅係，有次喺8號風球高懸下，Kanis朝早返工準備《東張》工作途中不幸撞車入院。但下晝一出院就繼續工作，仲話「唔會揼低單嘢唔理」，即刻趕返去繼續工作。舊同事透露當時見到Kanis連隻手都仲震緊，但依然咬緊牙關堅持，大讚佢：「好努力又有責任感，係一個善良可愛，又十分聰明努力嘅女孩子，值得被更多人睇到同支持！」
既有顏值好身材同時亦有高學歷專業資格，仲要抱持驚人嘅敬業態度同責任感，難怪Kanis於節目播出後更得觀眾喜愛，唔知各位求愛勇者，又感唔感受到佢認真果斷嘅優點呢？
《女神配對計劃2》星期日晚 20:30 翡翠台