熱播劇《璀璨之城》雖然只係剛播出幾集，但係劇情既緊湊又峰迴路轉，勾起觀眾嘅煲劇熱潮。當中 高海寧 飾演嘅Alice洪海允，嫁入官家成為大少奶之後，與飾演官孝君嘅舊情人兼叔仔 吳卓羲 喺屋企見面，孝君仲剖白當年點解揀 張曦雯 飾演嘅Kate王雪瑩做老婆嘅緣由。
喺呢幕回想當年嘅劇情中，劇組將 姜大衞 飾演嘅官志琛以AI方式回春，重返中年版樣貎，效果更獲讚兼撞樣梁朝偉。據監製透露，劇組以John哥1996年《再見亦是老婆》嘅對白作聲音資料庫，再套用現場收錄嘅John哥聲音頻譜，配合AI技術生成效果。另外，John哥喺劇中拎起一張龔慈恩年輕時照片，亦令觀眾猜測兩人關係。
同一集中，兩位官家少奶都分別沉船喺孝賢同孝君嘅懷抱中，先係因為呷Alice醋嘅Kate獲老公孝君氹返，大派定心丸，兩公婆再嚟個甜蜜情深一吻。至於孝賢娶咗Alice入門之後，一直都計劃利用呢位完美嘅太太去為自己達成目的。
呢集孝賢就設計一幕英雄救美，令太太Alice真心愛上自己，被封為「極品渣男」嘅考賢話「太完美先係唔完美，弱點其實可以變成優點，利用佢弱點控制佢 」、「喺佢最絕望嗰刻，先抌個水泡出嚟」、「真假其實唔重要，最重要係結果」，點知孝賢嘅虛情假意果然冧掂Alice，二人仲喺天台相擁睇愛情片。
《璀璨之城》星期一至五晚 20:30 翡翠台