G.E.M.鄧紫棋8月嘅時候喺天津嘅演唱會上，曾經同觀眾講咗句「我會唔會好快返嚟天津呢？」估唔到原來當時其實係埋下伏線，因為時隔兩個月佢又再次現身天津，而今次就係為擔任 李榮浩 演唱會嘉賓，而最重要嘅就係佢哋喺台上首次演繹合作寫嘅新歌《自由的你》。
早前G.E.M.為咗將尚未公開嘅《自由的你》作為禮物送畀深圳巡唱終極尾站嘅歌迷，G.E.M.同李榮浩各自喺密集嘅巡演期間為新歌製作，G.E.M.包辦詞曲同錄唱，李榮浩就負責制作同編曲，新歌亦喺巡演期間逐漸成形。
而歌曲推出後，李榮浩喺社交平台公開其中嘅製作細節：2版編曲、6版混音、3版母帶。而G.E.M.隨後亦指出，坦言深知巡演對時間、體力同心力嘅消耗巨大，所以特別感謝李榮浩忙碌之中仍精益求精，令深圳終極尾場前送出新歌嘅心願得以實現。
