歐陽震華捧周家怡新片場爆笑料 大讚演出《火舞黃沙》變「耀舞長沙」

歐陽震華 呢日罕有現身電影首映禮，力撐老友 周家怡 擔正嘅新片，仲指由當年電視台共事已覺得家怡演出功力深厚，不過就因為搞錯呢套經典劇集嘅劇名，即場搞出笑話，令全場傳媒朋友都爆笑呀。

myTVSUPER重溫周家怡《火舞黃沙》精彩演出

雖然Bobby一時大頭蝦要即場高呼同場嘅家怡問劇名，不過當年呢部重頭劇《火舞黃沙》遠赴寧夏大漠之地取景，家怡更因兔唇角色傑出表現提名台慶頒獎禮最佳女配角。仲即時勾起兩人曾合作嘅《不速之約》，家怡劇中仲暗戀Bobby呀。

至於有冇機會再同劇集最佳拍檔 關詠荷 再合作，Bobby指當年娥姐出山拍攝已經非常難得，雖然知道對方仲有戲癮，不過就首先要有合適劇本，佢本人就無任歡迎非常期待喇。至於最近佢參演嘅網劇同 古天樂 自《美味天王》後再合作，佢就指有如同老朋友見面一樣，感覺非常親切。

重溫Bobby娥姐隔世姻緣

擔正新片女主角嘅家怡，就笑指希望有機會再同Bobby合作演出，仲笑指今次應該掉轉由對方暗戀自己，不過被爆見親面都失態，家怡就解釋話次次飲多兩杯就會變得極熱情搵水吹所致喎。