胡定欣 同 陳敏之 呢日現身一個起步禮活動。月初定欣同老公迎嚟結婚一周年紀念，佢表示時間過得相當快，眨吓眼就一年，一周年呢日佢哋無選擇大肆慶祝，而係簡單咁食餐飯。問到有冇互相準備驚喜？定欣坦言自己冇準備驚喜，而食飯嘅地點亦係老公挑選嘅，佢話本身老公都想保留少少驚喜到當日先畀佢知，但因為定欣話自己想好好dress up一下，所以終於氹到老公提早透露地點。
對於好姊妹 胡杏兒 重返校園攻讀碩士一事，定欣就話私底下有同杏兒講笑，問到方係咪要邁進導演之路，當時杏兒話會努力，希望自己學多啲嘢增進多啲，所以佢哋一眾好姊妹聽到後，都叫杏兒將來開戲要預埋佢哋。定欣話知道杏兒重返校園呢件事一啲都唔易，除咗一個星期要返幾日學外，平時又要照顧小朋友，又要顧及功課，自己好佩服對方。
敏之呢日就帶埋囝囝 雷子樂 一齊出席活動，佢除咗經營自己嘅個人channel外，亦忙於發展香水副業，不過敏之都冇忽略囝囝，仲話要同阿仔一齊參與親子跑步活動。下月19號就係《萬千星輝賀台慶》，敏之透露自己將會有一個表演項目，所以而家要努力練習呀。
