林子祥（阿Lam）與葉蒨文（Sally）結婚多年依然恩愛如昔，呢對樂壇殿堂級夫妻檔目前正忙於舉行巡迴演唱會，近日網上流出65歲Sally喺重慶站獻唱經典歌《I Believe in Love》期間，因情緒高昂加上耳水不平衡，差啲跌落舞台。
片中見Sally喺台上勁歌熱舞，喺轉身做出舉手動作時，突然失去平衡向前衝，情況非常驚險，險些就跌落舞台，幸好身旁嘅男舞蹈員反應極快，及時將佢攔腰扶實，化解墮台危機，未釀成受傷意外，巡迴演唱會音樂總監兼鍵盤手趙曾熹彈彈吓琴，聽到Sally驚魂未定之下發出尖叫聲，亦立即中斷鋼琴伴奏，讓團隊能夠全神貫注處理突發狀況。
Sally獲男舞蹈員「英雄救美」後，臨危不亂展現巨星風範，幽默向觀眾表示：「太嚇人了，太興奮了，耳朵不平衡，舞台好黑，謝謝我們年輕的dancers！」隨後Sally迅速平復心情，繼續完成整場演出。
