岑麗香早前亮相王祖藍主持嘅TVB節目《藍朋友·旅朋友 溫哥華篇》，坦言當年父母原本屬意香香投身安穩嘅政府工，但香香因「貪玩」又怕沉悶嘅打字工作，毅然參選華姐後加入娛圈，因工作嚴重超負荷而耳背皮膚潰爛。香香近日響應2026世界銀屑病日，深明皮膚問題困擾影響自信，出席活動為銀屑病患者打氣 。
myTV SUPER《藍朋友·旅朋友 溫哥華篇》
香香喺2010年奪得華姐冠軍後加入TVB，曾演唔少劇集嘅女主角，深受觀眾喜愛。香香由於中文及廣東話底子欠佳，需要花費較多時間翻譯劇本及反覆死背，祖藍坦言曾目睹香香因Overload，耳仔背後皮膚嚴重潰爛，香香坦言當時壓力爆煲，又受人際問題困擾，驚打招呼唔夠友善，被人覺得佢好衰格，一度萌生社交恐懼症，承受來自四方八面嘅壓力。
香香喺2016年與老公強強結婚，婚後生咗兩個寶貝仔，香香減少幕前演出，主力照顧家庭，近日為響應2026世界銀屑病日，香香日前喺中環出席活動，呼籲大眾對銀屑病及銀屑病關節炎患者關懷同支持。
據主辦方估算香港約有22,500人患有銀屑病，當中30%同時患有銀屑病關節炎。岑麗香希望透過活動鼓勵銀屑病及銀屑病關節炎患者重拾信心，皆因銀屑病會導致皮膚出現紅斑及鱗屑，令患者唔敢着短袖及鮮色衣服，又或者要面對身邊異樣嘅眼光，容易產生自卑與焦慮，岑麗香喺台上呼籲大家一定要相信自己嘅美麗同價值，只要有信心，勇敢展現自信，自由自在咁享受生活每一刻！
