香港經典長壽廣播劇《十八樓C座》多年來陪伴廣大市民諷刺時弊。不過22號就傳出令聽眾不捨嘅消息，喺劇中飾演「周記茶餐廳」後欄洗碗皇后「祥嫂」嘅資深播音員 朱雪梅，宣佈榮休。
喺22號播出嘅一集，交代祥嫂將會返鄉下陪富婆堂家姐嘆世界，而「周記茶餐廳」眾人都戥祥嫂開心，而由金剛飾演嘅周老闆，就對祥嫂窩心表示：「皇后，如果你喺上面住到悶，想幾時返嚟咪返嚟囉。周記咁多年嚟，你都一直幫手撐住。我仲記得，由觀塘茶水檔開始，你就一直幫我，我都冇親口同你講聲多謝！記住啦，你幾時返嚟，周記都有你碗飯食。」最後祥嫂亦對一眾街坊及老周表示多謝。
唔少忠實聽眾都喺社交平台表示，以後喺劇中再聽唔到祥嫂親切又熟悉嘅聲音，實屬一大遺憾，不過同時亦為佢感到高興，祝福梅姐可以好好享受悠閒嘅退休生活。
《十八樓C座》自1973年首播以來，長做長有，係香港廣播史上最長壽嘅廣播劇之一。而加入商業逾55年嘅朱雪梅，喺1980年代中期加入《十八樓C座》至今，佢曾喺訪問中表示自己一生都未做過第二行，整個演藝生涯都係奉獻咗畀廣播界。雖然喺《十八樓C座》中飾演目不識丁嘅洗碗皇后，但現實中嘅梅姐精通水墨國畫，更曾多次為香港房屋協會親筆提筆，設計賀年利是封。
