劉愷威自2018年與內地女星楊冪離婚後，早前曾高調認愛內地藝人李曉峰，惟呢段戀情於今年4月告終，劉愷威回復單身不久，已火速覓得新歡，早前被爆與32歲黎紀君（Christy）秘密撻着，二人毫不避忌大方認愛，朋友之間唔需要再保守秘密，黎紀君開始喺限時動態放閃。
52歲劉愷威同黎紀君因熱愛打匹克球（Pickleball）與網球而結緣，二人志趣相投，秘戀約兩個月，愛得非常火熱，劉丹對於阿仔劉愷威有新戀情開綠燈，盼望能見吓呢位未來新抱仔。
黎紀君噚日喺社交平台放閃上載與男友劉愷威及好友去打波嘅合照。相中見洪永城同黎紀君閨密梁諾妍（Inez）同場，劉愷威喺影合照時，甜蜜搭住女友膊頭，話晒呢段戀情早已係波友圈公開嘅秘密，睇嚟一班好友對佢哋譜出戀曲，亦好戥二人開心。由於二人處於熱戀期，劉愷威目前主要留港陪伴佳人。
