方力申 繼七年前成功挑戰環島泳後，嚟緊將會再有創舉，佢會挑戰渡海泳，一路由香港游去澳門，能夠令小方有咁大動力，當然同慈善有關啦！
小方話當年為咗游環島泳，已經有十五年冇游過水嘅佢，特登訓練咗一年半去完成呢個環島泳，佢指完成咗呢件事後，亦令佢重新愛上游水，所以就再無停過一路游到而家。小方細佬正喺一間慈善機構擔任主席，而呢個慈善機構服務嘅對象就係基層、有特殊教育需要嘅小朋友，小方話佢細佬同佢講，話晒而家都做咗爸爸，係咪更加想為下一代做返啲嘢，所以就有呢一次港澳渡海泳嘅創舉。
今次港澳渡海泳全程35公里，預計需時要9小時，目標希望籌到一千萬嘅善款。雖然游水對小方嚟講冇難度，不過渡海始終有好多變數，所以點都有壓力，小方話最大挑戰就係自己老咗7歲，而家練水恢復嘅速度比以前爭啲，以前定下嘅目標每日都可以做到，但而家如果當日狀態唔得就要練少啲。
小方話可能日子漸近，令佢壓力倍增，所以呢排偶爾都會發惡夢，試過夢到個海全部都係鯊魚。小方指呢次嘅水域雖然應該冇鯊魚，但都有好多未知之數，例如當日身體狀態、會唔會被水母螫傷、中暑、撞到異物等，不過小方就叫大家放心，因為身邊有好多專家同團隊陪住佢呀。
提到囡囡IsIa，小方就讚囡囡有啲運動細胞，不過自己就唔會強迫囡囡要做女飛魚，一切都等佢自己揀。小方又分享囡囡學行嘅小習慣，但就呷醋指阿女第一句叫嘅係媽媽，之後叫爺爺，再之後先到爸爸。至於問到會唔會為IsIa添個弟弟或者妹妹？小方就話自己好想，仲話怕隔太耐IsIa會妒忌，不過一切都要講緣份呀。
