今個星期繼續由 王鎮泉 為大家送上電影資訊，大家仲記唔記得十年前嘅《蝙蝠俠對超人：正義曙光》？當年呢部電影飾演大反派Lex Luthor嘅演員Jesse Eisenberg憑住呢部戲獲得金酸莓獎嘅最差男配角獎，同時令佢演藝事業重創。
最近Jesse Eisenberg接受訪問時大方表示因為呢個獎，令好多大公司都冇再考慮搵佢演戲，逼於無奈轉換跑道，改行做編劇導演工作，仲話呢個行業好殘酷，好多時都係市場去決定去向，幸好佢能夠闖出自己嘅路。
另外，六年前專門製作星球大戰電影嘅Lucasfilm曾經公開宣布會開拍一部Star Wars外傳電影，以全新角色為主軸，仲搵嚟《雷神3》同《雷神4》嘅導演Taika Waititi執導，不過最近導演Taika表示呢個Project已經處於完全擱置階段，仲用「冰封得好徹底」嚟形容，雖然唔知原因，但Taika目前有四部電影工作在手，估計呢個Project翻生機會應該微乎其微。
本周電影新片速遞
《媽樣年華》：美圓係個徹頭徹尾嘅師奶仔，枯燥主婦生活佔據咗佢嘅人生，機緣巧合下，美圓意外踏進五光十色嘅鋼管舞世界，展開偷偷瞞住兒子同丈夫學跳鋼管舞嘅秘密旅程，生活從此添上色彩。另一邊廂，年屆70歲、少女心爆棚嘅婆婆鳳梅積極用交友app尋找男友，點知遭遇騙局，只好搬入美圓家，為本來已經藏有暗湧嘅許家帶嚟更多衝擊。
《泥面人》：Matt Hagen 由葛咸城街頭小子，一路爬升成為荷里活男主角，事業高峰、萬人矚目、即將獲奧斯卡提名，但一名本地黑幫頭目行動，令佢嚴重毀容，被團隊拋棄，一無所有。Matt尋找一種尖端納米科技療法，奇蹟地回復原貌，但奇蹟係有代價，納米粒子不單止修復佢嘅臉容，更放大咗佢內心最原始嘅不安同衝動、傷痛、憤怒、復仇慾。Matt由最初想奪回人生，逐步走上黑暗之路，追捕毀佢一生嘅人。
香港嘅票房龍虎榜，截至10月21日中午，第1位 《我阿爹想旅行》、第2位 《街霸》、第3位 《鯨獄逃生》。
