中聲唱將吳亦偉同蕭偉倫呢日一齊現身晚宴擔任表演嘉賓，兩人獻唱及同台下觀眾互動氣氛熱鬧，可惜美中不足無緣聽到佢哋合唱，兩人喺訪問期間就實現觀眾願望，無預警下合唱《左右為難》，雖然並冇預先夾過，但聽得出佢哋嘅合拍程度。
吳亦偉喺比賽時自創歌曲《吳亦偉》，令觀眾留下深刻印象，歌曲有望即場推出，所以佢近日除咗學好廣東話，亦努力籌備新作。嚟緊11月，吳亦偉會舉行粉絲見面會回饋一直支持佢嘅粉絲。
蕭偉倫之後就會聯同王鄭浚仁（Rax）到佛山開騷，笑言會將高音部份交畀Rax施展海豚音，自己則負責中底音，更大爆Rax好鍾意同佢男女合唱。
