鄧麗欣（Stephy）相隔14年再推出新專輯，日前舉行咗兩場音樂會，開騷當日適逢係Stephy正日生日，除咗過千粉絲同佢一齊度過之外，好友陳建安同藍奕持（LesterLam），仲鬼馬扮工作人員送上生日蛋糕，為Stephy送上驚喜，其後全場歌迷大合唱為偶像賀壽。
喺音樂會上，Stephy除咗演繹新歌之外，特意挑選一啲Sidetrack作品，見到台下粉絲反應咁熱烈，令Stephy心郁郁想開個Sidetrack演唱會，坦承今次順便試水溫。
Stephy更首度公開演唱出道時其中一首作品《小紅帽》，呢首歌令Stephy失守變大喊包，完全唱唔到首歌。Stephy坦言事先已經知道會衰，因為呢首歌喺屋企練歌時都會喊，唱番廿幾年前第一首自己包辦作曲填詞嘅作品，就好似同自己內心對話一樣，唱到某啲歌詞真係會忍唔住喊。
