魔音女團（MYNT）五位成員宋宛穎（Sabrina）、莊子璇（Hilary）、倪樂琳（Ellyn）、喬美莎（Chelsea）及盧映彤（Skylar）日前現身電台接受主持范振鋒、崔建邦及KT唐嘉麟嘅訪問，MYNT成員大談入圍趣事同過往被追求經歷，而倪嘉雯（Carmen）因身在內地工作未能出席。
myTV SUPER《魔音女團》嚴選「Magic Voice」
范振鋒笑稱宋宛穎來自「選美世家」，指其母親及表姨均曾參加選美，點解佢入圍魔音轉做歌手。宋宛穎坦言細個曾想跟隨媽媽參選，長大後卻越嚟越害怕，未敢付諸行動；直至疫情期間，媽媽建議佢閒來無事不如去試吓，宋宛穎喺截止日期前遞表參選港姐，其後又參加魔音女團選拔入圍。
宋宛穎透露初入選女團時並唔開心，因「魔音」兩字令佢自覺係「歌藝唔好」先入圍，喺參賽過程中，亦未知贏出後有機會踏足樂壇。喬美莎係隊中唯一入圍時感到開心的成員，原來佢把團名英文「Magic Voice」理解為正面意思，以為可以藉此展示歌藝；宋宛穎笑指喬美莎「畀人呃」。
眾成員毫無保留分享感情觀，21歲喬美莎係團中年紀最輕、身材最高嘅成員，喬美莎係澳洲長大嘅混血兒，由於媽媽係北京人，喬美莎識講普通話同廣東話。喬美莎較少被男生追求，因身形太高䠷，笑言擇偶首選比自己高嘅男生，更特別鍾情混血兒，佢話若果遇上心儀對象必定主動追求，可惜喺澳洲曾被媽媽朋友嘅兒子拒愛，仲話對方長相英俊。
隊長宋宛穎則自爆初戀主動部署，以行動「追男仔」，喺初中嗰陣為咗接近心儀嘅男生，報名參加五公里越野跑，狂練跑步追趕對方；後嚟兩人開始聊天，反過嚟由對方追求她，最終拍拖約一年半。
倪樂琳更大爆小六時已有十幾名男仔喜歡佢，多人示愛及收過情書，全班內大半男生都對佢有好感；不過倪樂琳當時年紀太細，並冇拍拖。倪樂琳話感覺到對方有好感，而自己無意發展，就會刻意放慢回覆手機訊息，甚至唔再回覆。
盧映彤被踢爆一日食七餐，卻係隊中最瘦嘅成員。盧映彤承諾到28歲便會開始做運動，即被眾人圍攻，范振鋒取笑佢唔好等，建議佢至少去夜跑，培養良好生活習慣。 莊子璇透露讀書時曾同時被三名同學追求，令佢覺得好煩，索性「落閘」，盡快切斷對方嘅希望。
魔音女團出道不足半年，已先後推出兩首歌曲，現正籌備第三首作品。第二首新歌《純粹好感》以少女曖昧、心動嘅粉紅氛圍為主題，喬美莎為唱好廣東話歌詞，更向隊友逐字請教發音。
