鄧兆尊一向率直敢言，近年不時喺網上節目爆出娛樂圈秘聞大派花生，早前佢爆出圈中有一位「集郵女星」，令網民化身偵探開始進行大搜查，令到關之琳、佘詩曼、陳煒、伍詠薇、葉璇等女星無辜受到牽連，成為「嫌疑人」，兆尊火速為幾位澄清洗脫嫌疑。
兆尊喺另一個網上節目表示自己並唔認識關之琳同陳煒，而阿佘就係「男仔頭性格」，自己亦唔會過問佢同邊個拍拖。兆尊話伍姑娘真人就係「細路女」，真人好怕羞：「佢講嘢好似好大癲大肺，好似咩都冇所謂嘅人，實際上哄吓佢，佢都被你嚇死。」兆尊更稱唔關葉璇事。
兆尊話自己所講嘅只係好小事，想知嘅可以睇返吳君如以前講嘅嘢：「好多佢都講過出嚟，喺圈內已經係唔係秘密嘅秘密嚟㗎喇！」
兆尊大爆名人富豪風流史，有人為拉攏關係同為利益而安排自己老婆去「招呼」朋友或生意拍檔，形容呢樣嘢喺富豪圈中叫「資源共享」、「極致招待」，更會「坐喺度食雪茄，問得唔得？掂唔掂呀」，令人嘩然。兆尊就對於呢啲嘢見怪不怪，因為世界上好多嘢係正常人諗唔到。
