TVB不時為員工舉行運動賽事，加深同事間嘅互動同團體精神。今次舉行《TVB爆旋陀螺王》賽事就吸引咗32位同事出戰，當中包括羅毓儀（Yuki）、林俊其（Kris）同劉展霆（Eden）等，而監製關文琛亦係選手之一，並且奪得殿軍。
雖然一眾藝員同事喺16強止步，但係大家玩得極之享受。Yuki落場時，男友Kris亦化身攝影師影戰況，吸引大批同事圍觀。 Kris好興奮公司舉辦呢個賽事，有機會與同事切磋一下，而陳頌天形容比賽興奮愉快，自己都鍾意玩陀螺，跟同事玩好開心。
文佐匡就認真搏命，前一日先開工拍完MV，瞓得三個鐘就起身為賽事練習；劉展霆就趁比賽帶咗一箱珍藏嚟參賽。
陀螺熱潮近年可謂一時無兩，唔少成年人重拾童年興趣。Kris分享幾個月前陪女友Yuki參加活動，自己好奇試玩，一試就覺得感覺好正，最後忍唔住開始研究繼而入坑。雖然Kris同Yuki都會一齊玩，不過佢就話呢啲嘢唔鬥得。
陳頌天就好慶幸自己到咁大個人都可以繼續玩陀螺，因為呢樣係佢由細到大嘅興趣，又係90後嘅童年回憶。曾錦燊大讚公司非常好，因為上次參加保齡球賽後，佢講過「如果搞陀螺比賽就好喇」，估唔到公司真係搞咗。
