台慶綜藝《試真D唷》播出之後引起熱烈迴響，江美儀、張振朗、朱敏瀚、曾展望同吳業坤五位主持呢日走入校園，同一眾同學仔互動。
五位第一站就去到一間小學，仲試食同學仔同家長一齊精心準備嘅便當。除咗味道得到美儀姐讚賞，仲話便當以精緻可愛、用咗螞蟻公仔作裝飾好有創意。
主持團派出坤哥以歌聲答謝大家，全場大合唱《陽光點的歌》呢一幕令美儀姐眼濕濕，覺得好感動。振朗幽默表示坤哥呢首歌推出嘅時候，小朋友們都未出世，估唔到大家竟然識唱。美儀姐更發現有同學仔將歌詞抄落簿仔對住唱，GM都話坤哥已經升級變「李白」，大家由「從前明月光」變「陽光點的歌」。
同學仔唔只識唱坤哥嘅首本名曲，連《試真D唷》主題曲嘅舞都識跳。最勁嘅係有一位「師傅仔」現身，可以配合主題曲即場耍功夫，睇到大家嘩嘩聲。原本主持團想派出空手道港隊坤哥扳回一城，結果坤哥嘅表現令全場爆笑。坤哥事後都話就算五個人一齊跳一隻舞，都鬥唔過「師傅仔」。
五位主持隨後去中學繼續試食繼續唱歌，氣氛一樣好熱鬧！不過開心背後，原來美儀姐全程忍住痛，皆因佢因為打乞嚏太過用力，搞到斷咗第六條肋骨，而家連呼吸都喺度痛緊。美儀姐自揭有個壞習慣就係打乞嚏唔會打出嚟，但醫生話咁樣容易將啲菌留喺身體，仲會將啲力反落去，叫大家千祈唔好學。