10月23號係黃翠如45歲生日，今年佢喺馬來西亞度過，更開心獲好友吳天瑜送上生日驚喜，約埋當地朋友聚餐一齊舉杯暢飲。翠如去年3月升呢做人母，誕下寶貝仔「蕭哈哈」後，一直專心照顧家庭，翠如近日復出拍劇，與黎諾懿飛咗去大馬開工，寶貝仔最近亦前往當地貼身陪伴。
翠如為咗兼顧工作同家庭，曾透露向劇組開出條件，要求每10日必須回港探望蕭哈哈，坦言曾因唔捨得阿仔而想推掉工作，幸得老公蕭正楠全力鼓勵，加上神隊友閨蜜吳天瑜承諾可以幫忙照顧阿仔，翠如就安心復出。
點知翠如對阿仔實在太牽腸掛肚，難忍相思之苦，已將哈哈接去大馬，翠如開工嗰陣，就由哈哈契媽吳天瑜幫忙照顧。翠如噚日喺社交平台貼出阿仔哈哈上游泳堂嘅影片並寫道：「哈哈來馬來西亞都唔可以荒廢學業㗎，謝謝契媽和契哥繼續帶我去進修，睇嚟下個禮拜可以去參加比賽。」
片中見哈哈開心坐喺室內恆溫泳池池邊，教練慢慢向哈哈身體淋水，讓哈哈適應水性，減輕恐懼感。而一向愛玩水嘅哈哈全程展露燦爛笑容，其後見哈哈坐喺浮墊，由最強契媽吳天瑜同契哥Danton陪玩，哈哈開心搖擺身體。
