受正規舞台訓練出身、近年於唔同劇集都表現耀眼嘅實力派演員 鄧智堅 ，近日由佢自編自導嘅全新舞台劇作品正式強勢公演。劇目創作靈感源自職場點滴，以辦公室內隨時隨地上演精彩扮嘢戲碼嘅女同事為主軸，將辦公室嘅人際角力爆笑浮世繪搬上舞台，唔通係喺SNK將一眾女同事嘅古靈精怪小動作都看在眼中而受啟發？
雖然於《新聞女王》系列中「飛爺」智堅同「Man姐」 佘詩曼 鬥到難分難解，不過戲外兩人其實極為老友。今次智堅舞台劇開鑼，阿佘就百忙中抽出時間，同《新聞女王》總監製 鍾澍佳 等圈中好友，親臨劇場現場欣賞，用實際行動為好拍檔站台打氣喇。
鄧智堅 雖然平時文質斌斌，不過演藝之路就相當傳奇。當年佢憑藉認意同戲劇天賦，破格入讀香港演藝學院，接受系統化表演訓練。畢業後投入舞台劇界多年，累積紮實功力同編導才華。
近年佢加入TVB，憑精湛同爆發力演出令人注目，更曾以《下流上車族》 關細孝 一角，於台慶頒獎禮勇奪「最佳男配角」。而於話題台慶劇《新聞女王》系列中，扮演老謀深算嘅「飛爺」一角，劇中同「Man姐」視后佘詩曼連場激鬥、勾心鬥角，金句頻出，加上手上永遠有一杯奶茶令觀眾大呼過癮。
