藝人 黃澤鋒 同太太 陳麗麗，2019年同去年以超高齡父母身份先後迎來兩名愛女，雖然過程中外界不時傳出唔同聲音同意見，不過夫妻兩人一直以正面態度面對，以愛守護家庭。近日幼女「小貴妃」黃熙喬最新近況曝光，可愛模樣亦再度融化一眾網民。
黃澤鋒同陳麗麗近日公開嘅片段可見，剛滿14個月大嘅「小貴妃」黃熙喬展現出超強學習能力，原本扶着圍欄嘅佢，勇敢邁開步伐跨出BB圍欄，踏着穩健步履小步前行。期間見佢眼神精靈、展露天真甜美笑容，仲有清晰目標，拎起心愛零食遞予媽咪，場面非常溫馨有趣。
除小貴妃學行姿態夠晒可愛之外，一對小姊妹互動亦係網民焦點所在。大女「小黃妃」黃熙恩自妹妹出世之後就展現出「家姐仔」本色，對妹妹非常疼愛。黃澤鋒夫婦亦經常喺社交平台分享一家四口嘅日常生活，而兩姊妹相處融洽、互相陪伴成長，亦獲唔少網民送上祝福，大贊一家人幸福感爆棚。
