關智斌暫放下美男子外貌 化身鐵鈎船長預熱萬聖節

踏入10月尾，成個香港都籠罩住萬聖節嘅氣氛，加上今年一早就開始嘅萬聖月活動，自月初經已見到有市民或遊客扮鬼扮馬現身街頭玩。當中美男子 關智斌 亦係其中一份子，星期六晚佢就化身鐵鈎船長Captain Hook現身尖東鬧市，參與萬聖節派對擔任嘉賓，仲獻唱咗《夢不落派對》同《LaLa世界》兩首歌。

大會仲安排咗一班小朋友為佢伴舞，Kenny就話一班小朋友上到舞台，佢哋嘅形象同氣場完全係搶眼，令全場觀眾同氣氛都推到最高潮。Kenny呢晚出騷亦非常盡興，與台下熱情嘅觀眾互動，實行玩盡成個萬聖節派對。