劉德華 12月將於紅館舉行20場跨年演唱會，今次係華仔自2018年後、相隔6年再踏紅館開騷，演出門票一開售就俾歌迷秒殺掃空一票難求。而為咗用最佳狀態呈獻予觀眾，華仔近日就公開一段綵排同籌備片段，俾一眾歌迷先睹為快。
片段當中紀錄華仔備戰演唱會嘅畫面，可見華仔現身錄音室練歌，極之投入咁逐一練唱，期間仲拍手跳跳紮，對即將來臨嘅演出似乎非常期待。隨後鏡頭轉到練舞室，華仔同一眾dancers 一齊進行高強度排練，不論係帶領大隊舞者，定係隨音樂跟足Rhythm狂跳，華仔每個動作都絕唔馬虎。
期間佢亦同幕後人員仔細討論演出細節，仲歡笑聲不斷，展現出專業嘅態度同高昂士氣。而片段最後，華仔更向鏡頭飛出一隻紙飛機，牆上就顯視出「See You Soon」字樣，預告年底同Fans紅館見面。
