現年65歲嘅「芹菜」蔡楓華 近日除咗積極籌備12月舉行嘅個人演唱會之外，日前佢接受相識逾40年嘅好友 翁靜晶 嬝上節目訪問，更爆出當年右眼曾遭黑社會以「鐵蓮花」襲擊，導致創傷性青光眼、視力永久受損。
翁靜晶於節目中指要為好友Ken哥討回公道，日前佢亦公開最新進展，指已經細閱當年口供，案發正確時間應為2005年3月。翁靜晶仲指發現「情節比聽到的更可怕」，又宣佈已邀請到一位比佢更資深、更穩重嘅律師跟進呢宗「鐵蓮花插眼」舊案。
雖然昔日陰影未解，不過完全無阻Ken哥對舞台熱愛。星期六佢就應邀到廣州登台，吸引大批內地歌迷支持。狀態不俗嘅佢於台上連唱多首個人代表作，當中包括經典代表作《倩影》，仲吸引唔少朋友大合唱。
隨住討論度高企，唔少網民同歌迷都對佢12月舉行嘅演唱會非常期待，亦有唔少歌迷留言鼓勵，指希望法律能為佢洗刷多年冤屈，同時亦期待佢喺演唱會繼續以動人歌聲獻唱，重現昔日風采。
