童星出身嘅25歲女星 劉芷玲（Sabrina），因於劇集《死有對證》中飾演法醫韋家雄女兒「林雪蕾」而大放異彩，劇中佢演活受校園霸凌嘅學生妹，又大曬流利日語，獲得大批網民激讚。日前劉芷玲喺社交平台拋出震撼彈，正式宣布赴日參加當地人氣地下偶像組合「Pretty Chuu」新成員及新偶像組合的徵選，展現跳出舒適圈、進軍海外偶像界別的決心！
劉芷玲其實早喺童星時期，已經加入過薛家燕創辦嘅「Honey Bees」少女跳唱組合，與 區明妙、 何榛綦 及 坂部佩莎 等為團友，擁有相當紮實嘅舞蹈與歌唱底子。其後佢畢業於第31期無綫電視藝員訓練班，曾參演《青春本我》、《隱門》、《靈戲逼人》、《巨塔之后》、《正義女神》等多部劇集，展現多變嘅演技潛力。
myTV SUPER重溫《靈戲逼人》
具備語言優勢與演藝經驗嘅劉芷玲，早已開始積極拓展海外市場，曾赴日參與地下偶像活動及表演。日前佢喺個人社交平台及地下偶像專頁宣布，將再次前往日本參加當地人氣偶像團體「Pretty Chuu」嘅新成員徵選，同時亦會參與新偶像組合選拔。從港劇實力小花到追逐日本偶像夢，劉芷玲勇毅追夢精神獲唔少粉絲留言支持，期待佢能夠順利過關斬將，喺全新嘅日本偶像舞台上繼續發光發亮！
