劉俊謙 現身汽車活動，佢話自己係慳家精打細算嘅男人，買車以實用為主唔會追款。屋企只係得一架車同太太 蔡思韵 兩份揸，不過太太就好少揸車，有時出埠自駕遊時，太太就會幫手做領航員，而太太指示好清晰。即使試過行錯路，但結果見到嘅風景比原先計劃去嘅地方仲靚。
Terrance早前原本要到歐洲工作，但臨時變成同太太度蜜月兼慶祝結婚一周年旅行，兩夫妻都玩得好開心，佢話今次係心靈之旅，冇乜外出購物，主要到郊外睇風景感受大自然。佢話平時兩人工作都忙，難得能夠密集式對住一個月非常滿足。
成為人夫滿一年，Terrance經已學識做人老公嘅求生之道，就係要幫老婆影靚相喇。佢仲直認好有心得，掌握一手好好嘅攝影技巧呀。Terrance話不論任何國藉，喺歐洲都見到男士好落力為女士影相，呢個係好好嘅成長必經之路。
佢又讚太太任何角度都靚，若果啲相影得唔好都唔會鬧，不過自己知道影得好唔好，因為太太滿意張相時，就會發自內心咁開心，佢就知道繼續呢個方向就啱，又話唔係睇太太面色做人，而係太太開心，就有開心人生。