農夫 同 張繼聰合演嘅20場綜藝舞台劇《人夫集團》，星期日嘅尾場順利圓滿結束。三人於尾場繼續同觀眾瘋狂互動，一上台就問大家對《人夫集團》有咩期待？當聽到台下有人大叫「除褲！」時，張繼聰就風趣回應：「呢度戲曲中心嚟㗎，做啲嘢好藝術㗎！」而6永就話：「我除褲都好藝術㗎，因為我係好抽象嘅，包你哋冇睇過！」
除咗分享人夫日常，佢哋又邀請夫婦觀眾上台補辦喜宴，更為一對「新人」即場炮製「早拍晚播」片段，非常有心思。
到演出尾聲時，三人除感謝主辦單位同贊助商以及觀眾捧場外，又互相向對方道謝，農夫大讚張繼聰非常包容，唔似拍劇、拍電影嘅「飛紙仔」，佢哋就只得「飛沫」：「我哋紙都冇，淨係同佢講改一隻字，不如試吓咁講，佢都照單全收，真係好多謝佢。」
而身為佢哋太太嘅 謝安琪 同 黃天頤 ，就喺觀眾席高舉「唔好諗住返屋企」Banner，惹來全場哄笑，而阿聰亦順道宣傳明年嘅舞台劇：「反正返唔到屋企，我惟有專心排劇，明年1月劇場再見！」
三位「人夫集團」主腦亦指合作非常開心過癮，對唔少人提議重演，C君坦言有考慮：「呢個係好適合 Re-run 嘅表演，不過再做嘅時候內容會有啲修改。」6永亦認同：「我哋知有好多人買唔到飛睇唔到，而家未知係開Part 2，定係2.0版，不過內容上點都會有啲改動。」有人提議改到紅館舉辦，C君就話：「我哋覺得戲曲中心好適合，但係場地個期都好爆，我哋想搵到一個可以同觀眾多啲互動嘅。」
完成演出後帶病上陣嘅阿聰要好好休息：「十幾年冇做舞台劇好好玩，但比想像中攰，臨開騷前病到失聲，好彩一星期好返。原本有個動作係跣住跪地，做到臨尾幾場感覺膝頭有啲怪，就去睇物理治療。因為膝頭撞咗十幾場已經瘀、有啲發炎，最尾幾場紥住護膝做，不過，物理治療師話真係好好笑，提議我淨係做部分動作。」農夫更笑言阿聰每場表演跪地後，返屋企都要被罰再跪所以比較辛苦。
佢哋覺得每晚同一對夫妻互動嘅環節最感動又驚喜，C君更話頭場被一位懷孕的太太感動，因為對方上台已經喊，而佢丈夫亦非常感激彌補當年未能舉行婚宴嘅遺憾。至於尾場上台嘅女觀眾適逢生日同樣感動落淚。
問到人夫們完成演出可會獲太太獎勵？C君就笑言：「我做完仲要打賞我太太，請埋太太去食飯，獎勵？冇懲罰就係獎勵。」阿聰就賣口乖話：「我做過乜老婆要獎勵我？做呢啲係應份嘅，全部酬勞畀晒老婆，仲會多謝老婆畀機會我出去演出。」不過謝安琪曾舉牌示意唔准返屋企，佢就話：「我唔知佢今日會舉牌，我盡量保持希望。」仲笑言唔入得門就瞓停車場，或者揸車出去兜風。