任賢齊 相隔15年，宣佈明年將重返紅館演出，日前佢喺澳門嘅巡迴演唱會，面對現場數百香港歌迷高舉「下一站紅磡」應援牌，終於親口公佈好消息，小齊話：「我申請到明年4月17、18號嘅檔期啦！」
小齊呢個早於2023年已經開始；曾於世界各地舉行200多場嘅《齊跡》巡演，原定今年年底於北京完成演出，不過如今因為終於成功申請紅館檔期，決定將真正壓軸終點站留喺香港舉行。
小齊上周末喺澳門開騷時，吸引過萬觀眾入場。當晚佢多次走到觀眾席同歌迷互動握手，而到最受歡迎嘅點唱環節時，現場數百名歌迷突然高舉「下一站紅磡」應援牌，場面相當壯觀。
其中一位香港歌迷成功獲得點唱機會，不過佢就反而先向小齊「追數」：「我5歲就已經去睇你演唱會！作為一個香港資深歌迷，我真係想講，我哋等咗你好耐啦！究竟幾時先輪到香港呀？」
小齊就解釋自己絕對唔係忘記香港，只係紅館呢個殿堂級場地實在太難申請，多年來屢次入紙都未能成功。佢更隨即笑住宣布：「我....終於可以話畀大家知，我申請到2027年4月17、18日紅館檔期啦！」令全場即時歡呼雷動。
事實上香港歌迷已非首次要求重返香港開騷，結果小齊經過三年努力，終於成功重返紅館。而原定計劃今年底於北京為《齊跡》巡演畫上句號，豈料紅館檔期獲批，整個計劃亦隨即作改變，將香港成為最終壓軸一站。
小齊坦言香港對佢有特別意義：「其實我都算半個香港人啦！由開始拍杜琪峯導演嘅電影，我已經搬嚟香港住二十幾年。我一早攞住香港身份證過日子，香港好多地方，可能仲熟過你哋！」佢仲指同事提醒上次喺紅館舉行演唱會已經15年前，令佢嚇一跳：「吓？有咁耐咩？時間真係過得好快！」
紅館演唱會消息傳開後，最令小齊頭痛嘅共非演出，而係接電話。佢笑言已經收到過百位朋友要求訂飛：「好耐冇試過咁多人打電話畀我！最搞笑係香港啲朋友，以前成日叫我幫手買其他歌手香港演唱會飛，我都話唔可以太多啦，兩張、四張好啦！」今次風水輪流轉，輪到自己開騷，朋友更立即獅子開大口。
「佢哋話，今次唔係其他人喎，係你自己喎！咁係咪終於可以冇限啦？每場留住200張先，之後再加！」小齊聽完哭笑不得：「我邊度有咁多飛呀？我連幾時開賣都未知，公司話等通知呀！」
香港歌迷終於等到紅館，不過台北歌迷就開始不滿，紛紛留言問佢幾時重返台北小巨蛋，甚至笑指小齊「偏心」。小齊聽完又再次苦笑話：「你哋係咪以為小巨蛋我開㗎？一樣好難申請㗎！」