周嘉洛近期挑戰動作與正劇角色，並因瘋狂健身變身「爆肌猛男」，早前拍新劇《驅魔速遞》擔正男主角，以為佢想擺脫《愛·回家之開心速遞》金城安嘅影子，點知佢噚日喺社交平台上載一條為一個品牌拍攝嘅搞笑短片，驟眼睇以為係島大女神「子珊」，點知一開口係男聲，以幽默、無厘頭嘅動漫風格，講述關於金髮戰士與「神奇香味」嘅故事。
《愛·回家之開心速遞》陪伴觀眾
嘉洛當日喺海濱長廊取景，見佢一人分演兩角，一時身穿白色襯衫與深色短褲、一時頭戴一頂金色長假髮，身穿長袖襯衫搭配短褲，變成溫柔又強悍嘅金髮戰士，先嚟一個金髮隨風飄揚嘅特寫，又加上櫻花飄落與美顏濾鏡，模仿日本少女漫畫嘅「美男子」夢幻登場，與其身穿短褲露出強壯小腿線條，形成強烈對比。
跟住劇情轉折，嘉洛去到一個健身室室內淋浴間，嘉洛竟然未有大方展現佢近期苦練嘅「爆肌猛男」好身形，反而嘉洛直接着住件衫，就企喺花灑下洗頭，身上嘅衣服被完全淋濕，嘉洛一邊撥弄滿頭嘅洗頭水泡沫、一邊對住鏡頭擺出自信又帶點誘惑嘅眼神，完美展現金城安式無厘頭與喜感。
嘉洛「封胸」着衫洗頭讓唔少想睇佢健身成果嘅粉絲有啲失落，之不過佢靠幽默感逗樂大眾嘅拍法，「重操故業」再度發揮其搞笑細胞，卻成功掀起《愛·回家》集體回憶。睇嚟即使嘉洛嘗試做正劇演員，私底下依然係觀眾最愛嘅「搞笑擔當」。
