香港網球「一哥」黃澤林（Coleman）最近喺體壇大放異彩，其感情生活同樣備受外界關注。月初先爆出佢同陳奕迅（Eason）愛女 陳康堤 結束短暫戀情，回復單身嘅 黃澤林 當時聲稱要專注打波，全力投入賽事。
不過近日前佢出戰「廣州南沙國際網球挑戰賽」（ATP 75級）男單決賽，就被網民發現場邊驚見籃球女神 譚旻萱（Mandy）特意北上為佢加油打氣，仲有人影到佢哋甜蜜共進早晨，隨即傳出「撻著」疑雲！
據網民所影到嘅動態圖所見，黃澤林完成比賽後，Mandy即上前與對方抱一抱，男方亦好自然地於Mandy臉上錫咗一啖，之後先大方與眾人齊齊合照。有眼利嘅網民就發現，黃澤林手上拎手機所用嘅藍色簡約手機殼，似乎同Mandy嘅係情侶款式。
喺另一段網民影到嘅片中，就見Mandy坐喺餐廳，見到黃澤林走近時，Mandy即笑得相當燦爛，據指二人食早餐時表現得相當甜蜜。咁啱Mandy喺月中曾PO出關於早餐嘅帖文，其中一張影住自家製早餐嘅組圖，其中一張就打上「Wifey materials breakfast」嘅字句，而黃澤林亦有喺呢個post留咗一個「😂」emoji，當時Mandy回覆對方：「🫱🏻👍🏻」
另外翻睇二人嘅社交帳號，Mandy同黃澤林喺月中都有出席澳門舉行嘅「NBA中國賽2026」，不過就未見二人有同框合照。
唔少網民睇到後紛紛留言熱議，指 Mandy 專程去廣州應援「絕非一般朋友咁簡單」，質疑兩人是否正在秘密發展中；亦有粉絲大讚 Mandy 有心支持香港運動員，親臨現場展現滿滿熱血。
