澳娛綜合澳門上葡京綜合度假村呈獻《璀璨之城》劇情相當緊湊，上星期 張智霖 推 姜大衞 落樓梯一幕，就睇到觀眾心都寒，劇集開播至今話題不絕兼狂吸141萬觀眾收看，演員們都好開心同大家分享喜訊。
張曦雯Kelly、高海寧、陳瀅 同 蔣祖曼 仲一齊炮製特飲，可以品嘗到Kelly嘅愛心飲品，呢個可以係 吳卓羲 Ron 嘅獨有福利喇，Ron仲話明明Kelly冇落糖，但飲起上嚟都好甜呀，搞到身邊嘅Kelly笑得相當甜蜜。
江美儀剛剛出場加入「官家」呢個戰場，嚟緊就會同新抱Kelly激烈交鋒，但估唔到婆媳大戰就令到Ron遭殃，Ron投訴Kelly喺鏡外偷偷地打咗佢一拳，仲傷心咁反問對方自己錯喺邊度；Kelly就話因為劇本冇呢場戲，所以佢唯有喺鏡頭外偷偷地打Ron一拳。Ron心酸話當日場戲已經要畀江美儀摑，戲外又畀Kelly偷偷地打一拳，相當痛心呀。
高Ling同陳瀅喺劇中是敵是友嘅關係令人懷疑，呢日睇佢哋喺台上嘅互動似乎有啲玄機，陳瀅仲話自己呢日嘅打扮係有原因嘅，西裝外套有男性化得嚟又有少少女人味，講講下佢仲伸手摟住高Ling嘅小蠻腰，仲搞笑叫大家估下佢哋咩關係。 
之前有傳聞指陳瀅喺劇中全裸一幕被私下傳閱，佢就話自己唔知呢個傳聞喺邊度傳出嚟，佢指知道劇集好多人睇，而劇中又有好多討論點，陳瀅坦言一眾演員咁用心拍，都想多啲人討論呢套劇，亦理解大家會有唔同觀點，不過佢直言作為演員拍呢套劇絕對受尊重同保護。
劇集喺澳門唔同地方實地取景，令觀眾認識到更多打卡位，好似近日劇中張智霖帶高Ling去拜祭嘅康公廟，仲有John哥同龔慈恩喺海邊漫步計劃公司動向嘅科學館，都係澳門熱門景點之一呀！
《璀璨之城》星期一至五晚 20:30 翡翠台