TVB戀綜《女神配對計劃2》七位女神 何沛珈 、 郭珮文 、 陳若思 、 俞可程 、 阮嘉敏 、 陳星妤 同 梁超怡 ，聯同求愛勇者呢日現身宣傳活動，大會安排女神同求愛勇者即場配對，再要求男士們做一啲令女神心動嘅行為，測試吓女神嘅心跳速度。
方智弘（Oscar）獲4位女神垂青，更獲媽媽撐場支持，原來成家人不時八卦問Oscar嘅戀愛取態，Oscar卻守口如瓶，係咁叫家人追睇就知道。被問會唔會採取「奶奶政策」，俞可程笑言未見過「奶奶」。
何沛珈近日是非不絕，佢坦言一開始唔知點面對，第一次接觸到海量惡評，用咗啲時間去消化，何沛珈坦言而家已經過咗嗰個階段，目前心情係好OK，佢指訪問出街後，收到好多加油打氣嘅訊息，何沛珈好多謝大家咁關心佢！
阮嘉敏喺節目裡面表現得大方得體，深得吳旭東（東東）同譚梓樂（Hepta）兩位男士鍾情，亦被網民封為「女神天花板」，阮嘉敏感謝網民稱讚，話大家係一個團隊，眾人都心地善良，只係性格唔同，佢好希望大家都得到稱讚，可以評論一下，唔好太過攻擊。
阮嘉敏話目前東東同Hepta各有優勢，仍在觀察當中，笑言覺得東東同Hepta好夾，鍾意同一個女仔時，二人相處好和諧。而陳星妤喺活動上，再次揀咗Oscar，更直認有私心，想對多Oscar兩眼，身邊嘅李爾晨笑指同部分女神以前係講公事，突然之間要與同事講感情，有時確實有啲尷尬，同場嘅吳兆麟向心動女神陳若思獻唱，陳若思就覺得林子朗唱得好聽啲。