林峯早前完成賀歲片拍攝，緊接動身前往泰國拍攝另一部新戲，近日喺曼谷忙開拍，行程可謂馬不停蹄。林峯今次新戲包含查案元素，有唔少高難度嘅打鬥戲份，噚日有網民喺泰國街頭偶遇林峯，其一身型爆幹練探員打扮，同場仲有王敏奕、莊錠欣（ELKIE）等。
片中見林峯身穿深藍短袖T-Shirt、軍綠色工裝長褲，頸上掛嘅似係警員證件牌，於當地一個民居大樓底層進行拍攝，王敏奕似係便衣探員，一臉嚴肅正「護送」被外套蓋頭嘅長髮女仔，上黑色嘅泰國警車，正拍攝一場警察查案及被媒體包圍嘅場口。
現場有身穿藍色「泰國警察」制服嘅群眾演員，仲有記者與攝影師造型嘅臨時演員同場，而莊錠欣拎住手機連自拍桿低調躋身於人群中，未知係拍攝定做直播！
林峯最近忙於世界巡迴演唱會，亦已安排好檔期，穿插拍攝呢套新戲，行程可謂馬不停蹄，為兼顧家庭同工作，早前受訪已講過要喺曼谷駐紮一段時間，太太張馨月同女兒「格格」Luna可能到曼谷探班。林峯預計於12月舉行廣州站個唱，稍後前往紐約、新加坡、美國等地展開巡迴演出。
