江華 同 麥潔文 結婚34年，育有一仔一女，縱使曾經陷入婚姻危機，不過二人最終攜手度過。近年熱愛喺網上平台同網民交流嘅江華，近日就喺個人影音頻道分享同老婆合唱《分分鐘需要你》，仲寫上長文向老婆表白，稱呼對方係「一生所愛」。
片中可見，兩人合唱時頻頻對望，充滿眼神交流，江華非常識氹老婆，讚Kitman「今晚真係好靚」。而喺長文中形容「一生所愛」呢四個字「太美，也太重。」歌曲當時唱嘅係至尊寶同紫霞仙子嘅遺憾，覺得愛係轟烈嘅，但隨時間變遷，江華對呢四個字又有一番領悟：「當你真的走過了大半生，再回頭看這四個字，你會發現，它變得不再那麼喧嘩了。一生所（愛），或許是一份熱愛。」
江華更解讀一生所愛，可能就係從青春走到白頭嘅老伴，或者一早就失去當年嘅激情，連「我愛你」都好耐冇講過出口，但彼此間有一樣更深嘅牽絆存在，就係默契同陪伴：「其實，當人走到某個階段，會發現『一生所愛』並不僅僅是某一個具體的人或事。它是一種能力。是你走過那麼多路、受過那麼多傷、看過那麼多離合之後，依然願意去愛的能力。」
