周柏豪 日前舉行兩場粉絲見面演唱會廣州站，兩晚現場都座無虛席，柏豪仲宣佈11月7號舉行嘅澳門生日限定場，門票一開售就被秒殺售罄，主辦單位更於旺角彌敦道甜用大型廣告祝賀，率先為柏豪送上生日禮物。
廣州站一連兩日於廣州體育館舉行，柏豪一出場就以《12號》拉開序幕，隨後再獻唱《同天空》、《最好不過》等大熱金曲。兩晚歌單充滿驚喜，柏豪唔止帶來新歌《混賬》、《純粹想哭》，又自彈自唱《愛情轉移》粵語版，更喺Band Sound環節連唱《金》、《到此為止》同《只有一事不成全你》等歌曲。
柏豪又喺演出前連續兩日現身親自向Fans派花茶，仲低調參觀歌迷嘅ColorWalk應援投稿，事後更指非常感動：「每一次去廣州開演唱會或者見面會，見到座無虛席嘅畫面我都非常感動，亦都好期待下一次再返嚟。上次總共喺廣州開咗7場，對我嚟講係一個非常滿意嘅成績。今次《綻放之章》再次返嚟廣州，兩晚都玩得非常投入，非常感謝廣州站以及所有去過城市嘅歌迷支持。」
而將於11月7號舉行嘅澳門站，因為貼近柏豪11月12號生日，門票早被搶購一空。柏豪透露澳門場舞台將有全新設計：「澳門站每次都會有啲唔同嘅嘢發生，今次特別加上延伸台，可以同內場甚至後排嘅朋友更加靠近。流程同內容上亦會同以往有唔同，我自己都好期待。」
提到生日願望，柏豪就直言隨年紀漸長，願望變得實在：「人長大咗，每一年嘅生日願望都係希望有多啲時間做自己想做嘅嘢，但最緊要都係自己同身邊嘅人身體健康、開心快樂同順順利利。細個嗰陣會諗得好天花亂墜，但現時最基本嘅順利就係最好。」
柏豪仲預告巡演將一路延續至明年初：「消息指後面仲有一站會去，時間會喺2027年年初。嗰個地方我以前去過開演唱會，但都一段時間冇去，好期待可以再去同當地歌迷見面。」
明年亦同時係柏豪入行20周年，佢透露目前已有計劃密鑼緊鼓籌備中：「眨吓眼就20年。2027年我自己會有好多大型計劃同企劃，希望藉住生日，祝願2027年所有想做嘅嘢都順利完成，可以帶到更多快樂同驚喜俾大家。」