樂壇天王郭富城（Aaron）迎嚟61歲生日，愛妻方媛（Moka）深夜喺社交平台大曬一家五口全家福，城城雖然步入花甲之年，但佢外貌身形狀態打破年齡界限。
10月26號係老公城城生日，方媛為老公舉行溫馨家庭派對，喺社交平台上載多張照片，並留言：「Happy birthday, my love.🎈🎂❤️😘！」枱上整齊排列多個精緻生日蛋糕，包括一個印有全家Q版公仔嘅雙層蛋糕、一個象徵城城愛駒嘅駿馬造型蛋糕，以及傳統嘅壽桃蛋糕。
相中見城城身穿恤衫，打扮帥氣，輕鬆抱起細女「三寶」郭詠心、另一隻手對鏡頭畀心，臉上洋溢着幸福笑容，城城與愛妻開心合照，流露出滿滿幸福嘅溫馨氛圍，唔少網民讚城城手臂肌肉線條緊實，狀態根本似40出頭。
大女郭詠希（Chantelle）同二女郭詠萱（Charlotte）身穿白色T恤搭配碎花半截裙，對住鏡頭擺出可愛姿勢，細女「三寶」擁有肉嘟嘟嘅粉嫩臉頰，完美承襲父母優良基因。方媛為咗保護愛女私隱，喺阿女眼睛後期加上唔同顏色嘅時尚墨鏡貼圖。
