張與辰 日前到出席馬來西亞一個表彰大馬華語同方言音樂幕前幕後工作者嘅音樂頒獎典禮，仲獲大會頒發「海外傑出表現獎」，能夠喺生日前親自返回家鄉馬來西亞領獎，令與辰份外開心。
頒獎典禮當晚頒發18項音樂大獎，大會指向與辰頒發「海外傑出表現獎」，係因為佢由馬來西亞出發，以創作人實力喺海外發揮光芒，多年嚟不斷突破自我，喺演唱同音樂創作以及製作領域亦同唔同嘅音樂人合作，令更多人聽見嚟自馬來西亞嘅聲音。
與辰喺台上表示，第一次喺家鄉得到音樂方面嘅獎項，已經係20年前嘅事。雖然期間佢都有喺當地奪獎，但都抽唔到時間親自領獎，所以可以親身領獎意義非凡。
事後與辰接受訪問時心情依然相當興奮：「其實馬來西亞已經有6年冇舉行頒獎典禮，今次有機會返嚟企喺呢個舞台上，真係好開心同埋好感恩，最感恩有咁多支持我嘅屋企人，同埋仲好多身邊嘅朋友都冇放棄，一直仍然支持住我。」佢亦感謝自己喺追夢呢二十年都冇放棄過，所以先會得獎。與辰仲承諾會繼續努力，希望下次可以攞多幾個獎。
與辰喺出席頒獎禮後，第二日喺生日正日就返到香港開工，而晚上就同「與辰同行」嘅一眾粉絲開生日會慶祝41歲生日。與辰仲拎埋呢個新鮮出爐嘅獎帶到生日會同辰粉分享喜悅，亦形容呢份係最好嘅生日禮物。