高海寧 周嘉洛 同 朱敏瀚 一齊現身節目《Grand住去首爾》記者會，三位現場分享今次喺當地體驗嘅極致吃喝玩樂行程，而短短幾分鐘嘅宣傳片中，經已令三人對旅程回味無窮。
呢次亦係高Ling第三次參與呢個「Grand住」系列，佢非常開心可以搭包機外，佢仲話感受到銀行為客戶提供咗好多獨一無二嘅體驗。而且喺成個首爾之旅，佢哋都見證住參與嘅客戶有幾咁開心滿足同享受。
高Ling喺行程中有機會同韓國型男整陶藝，朱仔就話最難忘同韓國演員 金鐘國 一齊拍攝，跟對方學健身動作時更被摸，就連金鐘國係咩味佢都好記得，講到興奮時仲即場示範當時喺健身房聞金鐘國嘅動作，完全變成小粉絲！
有份一齊同金鐘國拍攝嘅嘉洛就話，朱仔係經歷咗一次「戀愛」，自己從未見過朱仔咁嘅表情，仲話要同朱仔保持一下距離。高Ling就大爆朱仔喺車上雙眼發光，不停分享拍攝時同金鐘國發生嘅事，自己都好少見到朱仔有呢一面。
三位喺記者會上重現節目中嘅搞笑場面，朱仔即場再示範用口剝蝦嘅絕技，令高Ling嘆為觀止之餘，仲話好想挑戰一下。朱仔就話，佢覺得好奇怪點解大家做唔到，因為係一件好自然嘅事，只要擺得入口就可以做到。
《Grand住去首爾》10月31號起 逢星期六晚 20:00 翡翠台