草蜢 日前喺澳門舉行兩場演唱會，頭場座上客容祖兒更被三子即興拉上台合唱。Joey一上到台就向偶像表白，話自己係由細就聽草蜢嘅歌長大，蔡一智就問Joey：「有邊隻歌係識嘅？係熟嘅？」Joey就答：「不如問我，有邊隻你哋嘅歌，我係唔熟？」之後就揀咗好符合心情嘅《永遠愛著你》同草蜢合唱，隨後四人又加碼唱出Joey嘅《隆重登場》，令全場觀眾High到爆。
喺第二晚，草蜢就請嚟老友 古天樂 做嘉賓。四位合唱30年前，古仔為草蜢MV擔任男主角嘅歌曲《原諒我是我》同埋古仔嘅名曲《今期流行》。
古仔呢晚嚟其實唔止做嘉賓咁簡單，佢仲以「演藝人協會會長」身份，宣布草蜢成為「健力士世界紀錄」嘅「華語最長壽不變陣組合」，更由官方認證官將證書頒比三子，呢個好消息亦為呢次嘅演唱會劃上完滿句號。
