香港「網球一哥」黃澤林喺球場嘅成績令人觸目，而佢嘅感情生活近日就同樣成網民熱話。
黃澤林 今個月14號喺一個直播節目承認，已同Eason愛女康堤分手。不過短短11日之後，就被網民影到，獲25歲嘅「籃球女神」 譚旻萱 去廣州睇佢比賽，兩人仲喺賽後親暱擁抱，頓時令網民質疑新戀情係無縫接軌。而喺黃澤林嘅新戀情曝光前一日，康堤分手後首度出席活動，就大方回應分手一事。
康堤表示，分手會令大家有一定情緒同埋低落，兩個人喺呢段關係中一直專注自己嘅事。至於分手原因同埋係邊個提出，康堤就話只可以講係喺共識下分手，但具體就唔會講明。
對於舊愛喺直播節目講分手，康堤覺得大家都有自由同選擇要點樣面對同表達，而雙方亦都分咗手，所以要點樣同大家宣布分手，事前都冇特別聯絡溝通。
康堤父母陳奕迅及徐浩縈一向都愛錫康堤，所以康堤都話爹地媽咪全力支持佢嘅決定，聽到有傳媒問Eason同阿徐嘅態度係咪同康堤首歌《一律建議分手》一樣時，都令康堤忍唔住笑。
