區瑞強（Albert）與吳大強呢日作客TVB娛樂新聞台《StarTalk》，接受主播 潘盈慧 訪問，區瑞強謙稱屬第一代斜槓族，自己喺工作上唔勤力，朋友成日見到佢都係玩緊，Albert一年內開好多唔同主題嘅演唱會，佢感恩喺圈中人緣好。
Albert今次以傳承為主題，除咗電台DJ歲月，Albert話搵好友吳大強係盼望傳承同保育懷舊英文歌。Albert坦言大家係唱英文歌成長，對英文歌好有感情，而開騷亦好重視與樂迷朋友相聚。
Albert分享入行難忘事，以前喺電台工作係手忙腳亂，又要播黑膠碟、又要夾住個電話傾緊、又要開咪講嘢，完全冇電子化，真係要一腳踢！Albert話當年係一個新人，工作熱血有拼勁，每日主持3個鐘，又要喺TVB拍嘢、又要返學，呢啲真係後生仔先頂得順，人生時間用得好充裕，亦揚言永不言休！