1993年已同哥哥 張崇基 參加新秀歌曲唱大賽加入樂壇嘅 張崇德 ，日前舉辦入行以來首個生日音樂會，當日現場座無虛席，氣氛熱鬧。Petre興奮咁話：「今次係我首次舉辦生日音樂會，除咗香港嘅粉絲之外，仲有來自內地、澳門、加拿大同澳洲等地嘅朋友， 真係非常開心。 」
呢次生日活動， 除咗太太 劉美娟 之外，唔少過往曾合作，好似曾於電影飾演佢媽媽嘅胡美儀， 以及林志美、向海嵐、陳康健、孫佳君同漢洋等都有參與。
Peter亦釋為入行多年來都未曾舉辦慶生活動嘅原因：「其實我一直都冇搞慶生活動，係因為我係有社恐嘅，我好怕人多嘅地方，亦好怕大聲同噪音。 不過，尖叫聲同歡呼聲我就唔驚， 而且仲好鍾意愛聽！ 」搞笑解釋令到全場情緒高漲，尖叫聲同歡呼聲亦此起彼落。
之後佢喺現場樂隊伴奏下，演唱超過20首歌曲，更首度演唱由佢一手包辦作曲填詞嘅全新歌曲《瀟洒告別》。另外亦自彈自唱自己唔同作品。歷時近3個小時嘅音樂會絕無冷場，而中聲3組合CLS（李創偉、善玥澄、陳溢光）同 王鄭浚仁 亦到場支持又唱歌助慶。Peter仲同王鄭合唱《認錯》同《難為正邪定分界》。
事後Peter開心分享：「認識佢哋係因為喺《中年好聲音3》擔任過團戰導師，佢哋都好尊重我，到而家都叫我張老師。一直我都好欣賞佢哋, 所以今次同王鄭合唱都好開心。另外，我將會同CLS有音樂上合作，希望可以擦出火花。」
除咗音樂唱歌之外，佢仲預告將會迎接工作上全新挑戰： 「明年我將會喺香港一間大學擔任講師， 教授一個碩士課程，真係好期待。 不過， 我仍然會繼續音樂上嘅工作，仲希望盡快再辦一次Music Live。」
