林暐竣 將佛學「八苦」與「五蘊」哲理融入全新單曲《離苦》嘅現代情感深遠意境，歌曲分享「解開執念、回歸當下」嘅訊息。 MV以時空交錯敘事，為樂迷帶來視覺同心靈雙重衝擊。
Regent喺MV當中，挑戰一人分飾四個處於不同時空嘅交錯角色，故事橫跨過去同未來。佢分別扮演身處戰亂時期嘅飢荒平民，於生存邊緣掙扎面對生離死別；之後穿梭到奢華嘅貴族府邸，成為飽受病痛同孤獨折磨嘅貴族病人；後來穿越到現代，最後延伸至未來時空，喺虛無同未知中尋求心靈解脫。
為完美還原各個時空嘅場景，Regent拍攝戰亂場景時，同團隊徒步行山先可以到達取景地，現場環境潮濕又被昆蟲環繞，非常考驗意志力同體能。Regent仲分享未來時空嘅場景陳設中，特別加入Mini Show時用過嘅氣氛燈，巧妙融入MV之中成為彩蛋。
四個角色雖然身處唔同時代、面臨唔同困境，但就同樣被無形死結同困擾纏繞。Regent透過細緻演出，將唔同層面嘅「苦」展現得淋漓盡致，引領觀眾隨旋律一齊參透「擁抱後放開」嘅智慧。 
MV仲推出支援VR器材觀看嘅沉浸式（Spatial / Immersive）版本。觀眾戴上裝置後，就可以擺脫二維限制，置身於拍攝現場嘅震撼感。