台慶綜藝戀愛真人騷《女神配對計劃2》播出後熱話不段，每集播出後女神們同求愛勇者嘅互動都喺唔同社交平台成為討論熱點。
而今個星期日（11月1日）播出嘅第9集， 何沛珈（Roxanne）、陳若思（Amber）、郭珮文（Juliana）、梁超怡（Chiuyi）、陳星妤（Yvette）、阮嘉敏（Mandy）同俞可程（Kanis）幾位女神，就會同12位求愛勇者吳兆麟、吳旭東、俞鋆瑞、譚梓樂、李爾晨、林子朗、伍頌曦、侯建民、林福明、吳俊峰、方智弘仲有關經翰， 喺主題公園大玩水上遊戲，進一步展現各位真性情。
節目組率先發布各位女神嘅水着「搶先睇」，令大家眼睛先吃冰淇淋。Kanis、Roxanne以及擁有導彈級身材嘅Juliana著得較密實，至於超怡同Mandy齊齊成為「露腰」擔當，而星妤同Amber就憑青春本錢索爆搶鏡，女神各有各吸引之處，期待值爆燈！
除咗女神嘅單人相，節目組仲釋出大量合照同花絮照。女神們喺拍攝旅程之中亦結下友誼，喺曝光嘅合照中，Roxanne同Kanis攬腰翹手，變成孖公仔合照。至於Amber同Juliana就糖黐豆，喺影合照時攬到實一實，仲拖實手仔。大家都喺搵到真愛前，先搵到自己嘅好閨密。
《女神配對計劃2》星期日晚 20:30 翡翠台