蜜運中嘅 廖碧兒Bernice ，呢日出席活動時自帶粉紅泡泡效果，睇得出佢深受愛情嘅滋潤。早前默認與70歲百億富商 呂禮章 嘅忘年戀，雖然兩人年輕相差23歲，但Bernice就覺得年輕都不過只係一個數字，最重要係兩個人夾同開心，不過問到有冇結婚計劃時，Bernice就話冇計劃，如果有特別嘅喜事會同大家分享。
有傳媒指Bernice相當難追，到底佢係被咩打動到？Bernice即反問點解會覺得佢難追，有傳媒指要呂生呢個級數先可以追到佢，Bernice就叫大家問返對方，仲話自己冇資格帶人出嚟畀大家見呀。
對於早前於社交平台上載「I ❤️B」嘅相片，又被網民發現佢戴上巨鑽戒指，故被猜測將好事近，對此Bernice就作出否認，又解釋戒指係為美國天后Taylor Swift設計婚戒嘅設計師 Kindred，為佢度身訂造，送畀佢紀念入行25周年嘅戒指。
提到舊愛 劉愷威 承認與 黎紀君 發展中，Bernice就話同對方已經有十幾二十年冇見，不過都會祝福對方。
同場出席活動嘅仲有 詹天文 、林智樂 、 黃博 以及 李幸倪 等，Gin Lee早前做瑜伽時不慎扭傷，搞到行路時都有啲問題，但好彩幾日後已經好返。
