蔡卓妍 早前因為拍攝賀歲片日日食宵夜搞到發福，更因此被傳有喜。不過煞科後，阿Sa有健身教練老公Elvis幫手密密操練，呢日現身活動時又回復最佳清減狀態，重現小蠻腰。
阿Sa就話自己其實並唔係要追求好瘦，只係想練線條，所以拍完戲就冇藉口唔健身。佢仲話Elvis非常認真，有一日食完飯就開始捉住佢Mark期，令阿Sa都嚇咗一跳。
11月22號就係阿Sa生日，亦係新婚後第一次同老公過嘅生日。阿Sa笑言唔只老公想Mark佢期，好多朋友都想約佢。不過由於電影煞科冇耐，個人都仲有少少攰，有可能一次過慶祝。至於講到老公會唔會俾驚喜自己，阿Sa就話唔知，仲好幽默叫在場傳媒將報導寫的大啲添！ TWINS將會喺年底開騷，近日阿嬌已經歸隊一齊宣傳綵排做準備，目前令佢哋最難解決嘅係撲飛問題。
阿Sa都話自己嘅飛債係一波未平一波又起，加上老友容祖兒宣布出年開啟德騷，所以未處理完TWINS嘅飛，大家又再搵佢訂飛。但係佢已同身邊好朋友講好，唔會幫任何人買，因為幫人買飛實在太煩，但而家係同公司嘅Joey開騷，佢都冇辦法推，只可以寫低咗先，不過最後冇都冇辦法。
