麥玲玲 樊亦敏 同 糖妹 作客台慶綜藝《美食強人》，節目最新一集嘅主題講咕嚕肉，酸酸甜甜嘅口感啱晒女士們嘅胃。Amy瘦身成功之後，大家都以為佢會嚴格控制飲食，但佢唔只食得好盡情，仲好認真，令玲玲姐都話估唔到Amy咁識食，仲問Amy點先做到識食又唔肥？Amy就話，食嘅份量要啱，而且質量要好。
Amy其實呢日連打扮都特別花咗心思，衣著配色都同咕嚕肉好似。糖妹亦被Amy嘅用心嚇親，因為Amy帶埋溫度計同食物磅嚟節目，令玲玲姐都笑Amy好似驗毒一樣，可能會被餐廳列為不受歡迎人物。
Amy就覺得呢個節目好有意義，因為可以重新介定點樣去揀好食嘅嘢，所以自己都好投入支持，仲覺得拍完呢個節目後，有返肚腩仔。
三位作為「神秘美食家」，要符合神秘呢個主題，少不免要喬裝打扮下，不過糖妹就話，自己好認真戴曬眼鏡同帽，估唔到Amy同玲玲姐唔係咁。不過Amy就話自己好古惑，當時被問係咪去拍攝，佢就死口唔認，而玲玲姐就大方出現，話自己只係做資料搜集，仲會打電話去留房食嘢。
《美食強人》星期一至五晚 21:30 翡翠台