任賢齊 日前喺澳門舉行巡唱，連唱《對面的女孩看過來》、《傷心太平洋》、《海闊天空》等歌曲，當小齊見到台下有歌迷舉住香港紅館應援牌時，佢即刻上前互動，更無預警宣布明年將會重踏紅館嘅喜訊，令全場歌迷震撼又興奮。
小齊表示，自己每次都Book唔到紅館，但今年終於訂到，而且仲係佢相隔15年重返神地開騷。小齊形容紅館對歌手嚟講係一個好神聖嘅地方，喺嗰度開演唱會就代表被接受同肯定，所以自己一定會努力。 呢晚小齊嘅澳門站演唱會爆滿，加上小齊又唱又跳令觀眾氣氛高漲，佢仲即興走到台下同粉絲合唱，之後又憶起自己初到香港拍攝電影《星願》時，因為廣東話講得太差，搞到即使講感人對白都會令對手張柏芝冇辦法演落去，仲會話：「小齊你講普通話好嗎？」，令佢覺得非常唔好意思。
