陳展鵬近年熱愛玩社交平台，不時會親自下場同網民互動，憑貼地幽默形象吸納唔少新世代成為「好鵬友」。近日就有網民分享，收到煎Pan回覆佢兩年前發出嘅一封私訊，更因對方一個舉動而大感窩心。
事源呢位「好鵬友」喺兩年前私訊煎Pan，分享自己中學畢業，將煎Pan喺劇集《城寨英雄》嘅角色「拳佬」畫咗喺校服，又表示對煎Pan多部劇集嘅欣賞與支持。兩年過去，呢位「好鵬友」本身都預咗個DM已經石沉大海唔會有回覆，點知有日佢突然收到煎Pan回覆，令呢位「好鵬友」相當驚喜。myTV SUPER《城寨英雄》重溫城寨生活
最令呢位「好鵬友」估唔到嘅係，自己同朋友喺幾年前因為無聊而開咗一個群組私訊，當時仲加埋煎Pan入群，煎Pan喺回覆佢私訊後，竟然逐一私訊群組嘅成員，以「多謝你哋嘅支持，收到曬」以示自己嘅感謝，令收到私訊嘅「好鵬友」不單只感動，仲大讚煎Pan親切寵粉。
雖然煎Pan好Nice，不過分享呢件暖心事嘅網民都話「大家唔好打搞展鵬呀！🙏🏻🙏🏻小妹當年唔識野喺度玩亂add 佢入group 咋🤣」，有人表示羨慕之餘，仲笑言Feel到呢位網民個心跳到「鵬鵬聲」。
呢個post炸出唔少同樣受過煎Pan回覆嘅「好鵬友」出嚟，有人分享自己上年11月私訊過煎Pan，但突然喺上個月收到「最近好嗎？」嘅回覆兼問候，又有偶遇過煎Pan一家嘅網民分享合照，讚煎Pan同太太單文柔有禮貌同親切。睇嚟煎Pan可以擁有咁多00後、10後嘅新一代「好鵬友」，都唔係冇原因！
