劉松仁享受寫意生活，不時會喺社交平台分享昔日點滴，松哥噚日（28號）就以「沉默是金」為題暢談往事。
松哥話早年喺台灣同楊佩佩合作嗰幾年，唔知點解除咗佢之外，通常都會配上一位香港女演員，松哥話由於自己喺演藝界資歷較深，人亦比較老，所以喺演戲同做人方面都比較老土。
講到女演員初到台灣演出電視劇，難免喺劇組同新嘅生活環境中，喺適應上遇到困難。松哥就覺得自己責無旁貸，加上性格使然，覺得有義務畀佢哋一定嘅意見同照顧。
松哥喺文中仲鬼馬地自問自答：「我係唔係好色，藉此接近佢哋，就不得而知？『人』難免總會自欺欺人 ! ! !」之後佢又分享有次遇到一位香港女演員，向佢請教咗一個問題「若果遇到別人在報張上惡意對你非議或攻擊，你會怎樣回應？」當時松哥就表示一般佢都係唔回應。
松哥解釋見到呢種報道，要做到保持平靜同無反應談何容易，佢話：「自己知自己事，尤其係我呢種火爆性格，無反應就假嘅。我又點會按耐得住！所以我通常儘量採取鴕鳥政策，唔去睇呢啲八卦新聞，唔畀自己心情同有機會起起伏伏。」
松哥嘅觀點係一個鍾意背後講是非、評擊或攻擊他人嘅人，久而久之一定會樹敵眾多，變成一個「是非者」。而喺呢個圈子，唔畀心思同努力工作，通常好快會消失，因為觀眾眼睛係雪亮，最好證明，係智者看結果，而佢相信同信仰嘅係積口德。佢喺帖文寫道：「藉著這件事，每一件事，每一個經歷，經營自己。怎樣做人、怎樣處世、怎樣修養、修為自己，儘量不受外界干擾，好好經營個人的格局，默默走自己的路。」
