JW 王灝兒 上月被爆婚訊瞞足近一年，指佢原來早於去年11月22日，已跟圈外富商男友 Jim Wong王至尊 喺土耳其低調秘密註冊結婚。適逢當時JW嘅好友 陳瀅、羅天宇、陳懿德同馬天佑等都喺土耳其旅行，仲有眾人打扮得體嘅合照，相信係一齊見證JW嘅人生大事。
對於已婚一事，JW一直未有回應，不過喺今日（29號），JW就向傳媒發送一個紅色紙袋，內裡有一張造型極似紅色請諫嘅新歌介紹，上款寫上「JW&JW」，內文「謹以至誠，邀請您傾聽我們製作的《JW²情歌》，見證我們人生新篇章的開啟。2026/10/30」，並附上一盒曲奇西餅，令人聯想JW欲借新歌宣布喜訊。
JW嘅新歌歌名同樣充滿含意同心思，正因為除咗佢英文名Joey Wong，簡稱叫JW，而剛好佢嘅另一半王至尊，英文名Jim Wong，簡稱同樣叫JW，所以新歌正正代表係兩人嘅情歌。同樣新歌派台宣傳方法，亦似乎有派囍餅宣布喜訊含意，紅色請諫印上「見證我們人生新篇章的開啟」，宣傳人員指JW今次係憑歌寄意，相信大家都非常期待JW²正式宣布喜訊，接受大家嘅祝福。
